Kun nagbaha sa Iloilo tungod kay Bagyo Frank, ako ya ginbahaan man sg dimalas. Ahay, talagsa lang ko bala naga entra sa mga paindis-indis sa internet apang ginadimalas gid. Anay kay manug deadline na para sa pag-report sg mga puntos sa WPThemeDesigner kagab-i, amo pa ya nag inarte ang SmartBro ko. Gintingub ko pa abi bag-o mag report para tani bala isa na lang ka pag comment. Kay man ti may obra pa ya si inday indi man ta ka pinagusto bukas sg mga blogs kun may opisina. Tapos nagatudlo pa ko sa isa ka buluthuan pagkatapos sg opisina, ti alas nueve y media na ko ya naka-abot sa balay. Syempre pag-abot nag paandar ko dayon sg computer. Excited pa ko tani. Hala ka kay indi na ya mag konek ang lilintian nga SmartBro. Ngaa subong pa?

Wala pa gid ako nadulaan sg paglaum, gintestingan ko naman konek paagi sa Globe 3G. Ahay, otro pa gid ni na palpak. Pwede ka pa ya kainit tubig kag magtimpla kape bag-o ya mag load ang website sa tuman nga kahinay. Ti namalhan si inday. Namuti ang mata. Ginlumutan. Gintubuan gamot. Wala gid tsansa mag tsampyon. Naghulat gid asta tungang gab-i para lang maka konek sa internet maski may laktan pa pagka aga sg banwa sa bwas. Maayo lang nakahingagaw pa submit. Nalipay gid ako ya pagkabaton ko sg email nga nakasulod ang akon entries. Nakatulog man si inday sg mahamuok.

Subong nga gab-i pag-abot ko halin sa kabukiran sg Cadiz City, dali-dali naman ko nga nagbukas sg computer. Gin check ko ang blog ni ChiQ Montes, aba ara na gali ang mga nagdaog. Ginpangita ko ang akon ngalan sa listahan kay sa akon pagkahibalo daw medyo mataas man ang akon puntos. Huwat?!? Wala akon ngalan? Why, oh why kalamay? Maski na lang tani sa listahan sg mga kulihot wala gid ya. What’s wrong? Anay ka… indi bala dapat naka subscribe gid sa email para ma qualify? Ti daw nag subscribe man ako? Daw gin confirm ko man ato ang gladyct@gmail.com? Dipuga, basi wala na send tungod nag-inarte ang akon koneksyon. Abi ko na confirm gali wala siguro. Anay ka, may nabaton man ako nga email update sa promdiliving@gmail.com. Buot silingon naka subscribe ako sa email! Ugaling sa ano nga kadimalason ang gingamit ko nga email address pag submit sg entry ko amo ang gladyct@gmail.com. Na amo na kay pwerte kadamo sg email address. Sala-sala warrior ka gladita! Nagbalon ka gid langka. Tani may Premium Theme ka na. Pahuway sa banga.

Ti anhon ta na bi? Dako pa tani sg puntos nga natipon ko. Daw may tsansa gid tani nga madaog ko ang isa ka Premium Theme. Ti daw mahibi man ko tani e. Daw mahibi sa kaugot. Wala naman ko galing mahimo. Kanugon lang sg luha. Hala, pahuway na lang sa banga. Ang akon na lang consuelo, isipon ko na lang nga nabuligan ko promote ang obra sg Pinay nga si ChiQ Montes. Sige na lang para indi man gid magtam-an kalain buot ko.

Basulon ang tanan nga balasulon. Sugid-sugid lang ni Smart kag Globe. Teknolohiya niyo palpak! Inaway da!